三两知己想静静倾偈 旺区有咩好介绍?

食。攻略 4年前 (2016-06-28) 0

类别: 资讯 |

来源: www.openrice.com
  

详情:

日日返工返学都有唔少压力,有时想话放工后约返个朋友仔倾下计谈下心,或者只系简简单单吹下水咁,但都好似好难。难唔系难在夹时间(虽然呢个都难),最难系搵个地方可以静静地,慢慢坐,边食边倾又唔会赶你走嘛。你知而家周围都话有入座限时,个零两个钟就话要你埋单,食得嚟又倾唔到计,就算真系倾到都deep唔到,唔通下下都落bar咩?不过你哋有开饭仔呢个朋友就唔使愁,呢度有5间位于旺区嘅餐厅,都几啱谈心㗎,兄弟姊妹团要倾婚礼嘅嘢都一样啱。

文青café   小房子




呢间喺旺角嘅楼上café,位置上系喺冇咁旺嘅地方,而且冇大招牌挂出嚟,一个唔留神就会行过咗转上去嗰条楼梯。上到楼,系一间以温室花园做主题嘅café,每张枱枱櫈櫈都唔一样,有矮櫈有梳化櫈,所有嘢都好似好随意咁,畀人一种好relax好free嘅感觉,几个知己谈心就最啱嘞,而且全部花茶、热饮都可以无限次再添,唔怕会倾到口干!

嘢食方面,款式就唔算好多,但都几吸引,以轻食为主。想食蛋糕嘅可以谂谂豆腐蛋糕或者甘荀蛋糕,都系平时较少见嘅口味,前者芝士味轻,豆味重;后者感觉同样清新,另外仲有潮食水玄信饼!

好倾好食   红粉佳人



呢间餐厅嘅位置同样喺闹巿中嘅一个较易被忽略嘅角落,但其实默默都开咗十几廿年。入到去灯光暗暗地,都几浪漫㗎哈哈,不过浪漫唔一定要同另一半嚟,同好朋友一样得,大部分座位都系卡位嚟,仲有房仔添,基本上,星期一至四晚都冇入座限时嘅,可以慢慢摸下酒杯底都得。

虽然对住好朋友,倾偈都可以倾饱,但都要填下肚嘅,嚟到呢度必试佢嘅三文鱼泡沫忌廉汤。好似咖啡咁层泡泡喺面,哔到落底仲有一大片烟三文鱼,成碗汤都好香浓嘅三文鱼味,好开心。甜品嘅香橙味心太软都值得一试,啲朱古力流心都几澎湃,仲有啲真·橙皮,甜甜地涩涩地。

悠闲叹茶   难得糊涂



呢间café畀人感觉好光猛,而且枱同枱之间有一定嘅距离,空间感都几多,三两个好友围埋倾心事讲“咪咪”都唔怕畀隔篱枱听到会尴尬。

而且呢度最大嘅特色就系有好多少听啲嘅中国茶,就算系普洱,都有分好多种,唔同年份又有唔同咁样。普洱奶茶嘅茶味够浓,同时渗有奶香,而普洱生茶就有少少甘……倾嘢唔饮酒,饮茶都一样得,仲多咗份放松嘅感觉添。

宁静咖啡室 caffè HABITŪ



Photos by Edwina Chan & chiu_zone

好多人都钟意搵间cafe,饮住咖啡咁嚟倾偈,呢间喺The One嘅咖啡店都系一个唔错嘅选择。虽然座落喺大商场,但佢位处嘅一个角落相对嚟讲比较静,成个setting都好舒服,都几啱朋友嚟吹水倾偈。

倾偈前就梗系要嗌返杯咖啡啦,嗌乜好呢?薄脆焦糖咖啡吖,加咗焦糖唔会苦得去边,焦糖同咖啡中间仲有多层滑捋捋嘅泡沫添,系有层次嘅。想食少少嘢嘅,沙律都系一个唔错嘅选择,有款红菜头汁配新鲜沙律菜,好鲜甜㗎。如果你想食多啲嘅,叫返个千层面都ok㗎。

低调西餐   合一咖啡屋餐厅



又系一间楼上cafe,餐厅望落感觉都几宽敞,一班人想话围埋一齐倾下偈仲可以早啲卜定间房仔,咁到时就可以有一个完完全全属于自己嘅空间,倾乜倾几耐都得。

嘢食方面都几有惊喜,首推焗芝士吞拿鱼开面三文治,开面固然系一个卖点啦,而另一个卖点系,佢多多料嘅包上面,有一大团吞拿鱼酱,再上面有大块火炙芝士呀!系溶溶地嗰只呀!另外呢度嘅意大利芝士饼,系用好正宗好传统嘅手指饼嚟做中间夹心嗰层,又香口又软身。

如果你哋钟意嘅,下次再同你哋介绍其他区嘅谈心点!

 

#豆腐蛋糕#甘荀蛋糕#忌廉汤#普洱奶茶#焦糖咖啡#吞拿鱼#火炙芝士

iWSD香港攻略