5月份好评餐厅十强

食。攻略 4年前 (2016-06-12) 0

类别:资讯

 |
来源: www.openrice.com

详情:

嚟到5月份嘅十强榜,继续都系有好多新势力上位,今次又有7间餐厅首次上榜喇!甜品餐厅依然占咗几个席位,不过值得留意嘅系头两位都系汉堡包店,仲要系上过几次榜,甚至拎过奖嘅餐厅,似乎已经成为港人嘅宠儿。第10位 地窖门(*新上榜)

果然港铁延伸到坚尼地城之后,西环附近多咗唔少“好西”,呢间Wine & Tapas Bar就系例子之一。位于香港大学站附近一条安静嘅小街,落到地窖环境气氛都相当唔错。小食同Tapas总共有18款任拣,Tiger Prawn & Pesto Pasta有大大只吸睛海虎虾,带蒜香嘅青酱搭墨汁面亦绝无欺场。Korean BBQ Ribs烧得啱啱好而且牛肉够腍,亮点系非常惹味嘅韩式烧汁。甜品Chocolate Brownie朱古力味浓郁,加上饮品价钱相宜,Chill Out好选择又多一个。


Photos by 手瓜起展joggling
第9位 糖室(*新上榜)

隐藏喺石硖尾屋村冬菇亭当中嘅新甜品店,装修骨子舒适之外,甜品行中西Fusion路线,无论同FD子定屋企人去,都总会搵到你嘅心水。西式代表有心太软,共有五款唔同口味而且仲配埋特制雪糕,例如柠檬夹心饼心太软配蜜糖乳酪雪糕,值得一讃嘅系带酸嘅柠檬味心太软味道真系好似系个食嘅柠檬夹心饼味,童年回忆即刻返哂嚟。而且流心度高,相机食先一流。中式代表就有玫瑰杞子雪耳露,养生滋润又唔太甜。


Photos by heidimawander2wonder
第8位 阿麦厨房(*新上榜)

位于铜锣湾属于同名书店嘅Cafe,虽然地方唔大但胜在有旺中带静嘅感觉,而且食物水准稳定,一班人嚟一边食餐饭聚下旧就啱啦。由一开始嘅餐汤就先声夺人,黑松露菌忌廉汤嘅黑松露香味浓郁,配埋未完全打碎所以特别有咬口嘅蘑菇系无得输嘅绝配。主菜方面就推介BBQ 烤辣味西班牙猪肋骨同德国式烧咸猪手,前者大份得嚟又惹味,后者皮脆内嫩唔油腻。总括嚟讲性价比甚高。


Photos by ronronyip
第7位 HeSheEat

上个月旺角店重登4月10强之后,凭住五月超强优惠,只要身份证上有指定字母就会送甜品、饮品甚至意粉,今次轮到铜锣湾店第6次进入10强!无论系咸食定甜品都保持到水准,例如微辣嘅墨鱼汁鱿鱼扁意粉香气四溢,鱿鱼亦新鲜弹牙,就算因为墨鱼汁而会食到个嘴黑哂都依然有唔少捧场客。绿茶心太软卖相吸引,切开有流心效果亦有茶香,配埋豆腐雪糕,满足甜品胃之余亦解腻。


Photos by ChloeDeng3677Captain Gourmet
第6位 锅呵呵(*新上榜)

香港人有几爱打边炉?我唔直接答你,我用例子嚟答你:又有一间火锅店上10强榜啦!初夏天气开始热,要开冷气之余食嘢口味亦变得Light咗,所以深水埗呢间楼上小店嘅原味椰子鸡锅就顺利跑出。汤底用咗新鲜椰青同椰子水再加大大件鸡件,完全唔洗加咩味精鸡粉都够清甜滋润。二人餐拼盘嘅配料亦分量十足,肥牛、海鲜、豚肉同蔬菜一应俱全。另外仲有蒸气锅同传统火锅,嚟多两次都唔怕闷。


Photos by tempbond
第5位 February(*新上榜)

虽然而家已经系6月,但系呢间以2月为名嘅餐厅一样都咁受欢迎。主打德国菜,嚟到一定要试火焰咸猪手,上枱嗰阵成只喺你面前烧着佢,等你拍够片影够相,就帮你切埋,怕肥嘅都要食一次层皮,因为真系好脆,而肉质亦烧到啱啱好,又有啲肉汁,唔怪得开张一排咁快就上位。



Photos by siu shan
第4位 Tom N Toms Coffee(*新上榜)

嚟自韩国嘅咖啡店,咖啡固然之有返一定嘅水准,但系呢度嘅吐司实力都不容忽视。招牌嘅有蜂蜜奶油吐司,啲蜂蜜多到流浆咁,仲有一大堆cream喺面,忌廉怪一定好钟意。但如果怕cream嘅朋友就可以拣蜂蜜芝士吐司,两层厚多士中间夹住芝士层,店员已经预早帮你切好九宫格,轻轻叉落去一拉出嚟,就好容易咁做到拉芝嘅效果,真真正正外脆内软呀!



Photos by 为食MoJil & foodlife
第3位 霸吗拉面(*新上榜)

尖咀分店嘅menu同老铜嗰间又有啲唔同,嚟呢间嘅话记得要试下鸡肉叉烧拉面,即系将啲鸡整到成嚿叉烧咁嘅样,又几似㖞整得,仲系厚底嘅添。而面质亦烟韧弹牙,几爽口。另外,呢度嘅辛辣拉面净系斋睇色水都知真材实料,成个汤底鲜橙色咁,闻都闻到阵辣味,加埋啲面索晒汁咁系好有料到嘅!



Photos by kkngkk2 & Raul L.
第2位 Burger Joys

话呢间餐厅系香港人嘅新宠儿绝对唔过份,单系2016年头5个月,佢哋已经上咗榜3次!冇计,啲burger即叫即整,上到枱仲系热辣辣,而且充满惊喜。每日限量供应嘅Hiro burger中间块扒系和牛嚟,而磨菇汉堡中间系真·磨菇扒嚟,用磨菇碎整成,好似平时汉堡扒嘅质地咁,其他配料都有好多,个口细少少都唔可以一啖食晒!



Photos by BoBo_Chow926 & apuruw
第1位 Burgeroom

贵为“开饭热店大赏2016”至尊大奖嘅得主,而家荣登埋5月份嘅榜首,进一步肯定佢喺汉堡界嘅地位!佢嘅汉堡有几咁特别应该唔使我再多介绍,鹅肝钟意嘅打孖上咁夹住落块汉堡度都得,仲边有得输?今次想讲下呢度啲小食,汉堡固然要衬薯条,有芝士酱仲有牛油果酱,好惹味!仲有薯丝虾,薯丝炸到一个个圈咁包住鲜虾肉,脆卜卜!



Photos by 阿古兽 & Shir Berry
 

#港饮港食#排行榜#burger#拉面#甜品#咸猪手

iWSD香港攻略