寻找太子的味道 7间餐厅推介

食。攻略 4年前 (2016-08-07) 0

类别: 资讯 |

来源: http://www.openrice.com/

店铺名称:金华冰厅/笼太子点心专门店/好妈妈台湾馆/美味饺子店/陵发潮州白粥/津津 好金の味

 |

详情:

油尖旺系唔少香港人Gathering嘅聚脚点,不过如果你自认已经试哂旺角同旺角东港铁站附近嘅餐厅,不如行远少少嚟太子!选择多之余又有旺中带静Feel,无论你系一支公定成班Friend,想食个包定擦大餐都有好介绍。港式经典菠萝油  金华冰厅


虽然应该系唔少吃货“细细个就听过嘅名”,不过循例都要介绍下嘅。太子呢边嘅老字号冰室嚟讲,佢地认第一应该无其他人敢认第二。最出名嘅一定系唔少港人同游客都慕名而嚟嘅菠萝油:新鲜出炉热辣辣嘅菠萝包再夹块冻牛油,一热一冻一脆一滑,配多杯茶走真系无得输。赶时间嘅话外卖个菠萝包食亦得,得咗。

抵食新派点心  笼太子点心专门店


港式美食除咗冰室,仲有酒楼里面嘅一盅两件。呢间点心专门店就新旧兼备,既有大家食开嘅虾饺烧卖,亦有唔少创意点心。例如海皇芝士千丝卷卖相就已经够吸睛,炸到脆卜卜嘅面丝入面系惹味芝士酱同弹牙虾肉,配搭得宜。另一得意点心叫“不是炸两”,咬落就发现肠粉包住脆脆、虾胶同西芹,无论口感定味道层次都比真·炸两丰富。

地道台湾家常菜  好妈妈台湾馆


想转个口味就可以嚟呢间小店,一尝宝岛风味。招牌菜之一卤肉饭嘅卤肉肥瘦有致又入味,加埋酸菜捞饭食,香浓而唔死咸,加埋半只溏心蛋够满足。菜甫蛋披萨睇落的确几似厚批Pizza,厚厚一件食落有蛋汁唔干身,香口得嚟同时食到菜甫嘅惹味同蛋香。其他招牌菜例如皮蛋冻豆腐、卤水拼盆同香酥大鸡排都系港人熟悉嘅台湾味道。

识食梗系饮埋汤  美味饺子店


店名够简单直接,就系一间食好味饺子嘅小店。有云耳椰菜饺、韭菜肉饺同白菜肉饺三款馅料,然后再拣要汤饺同煎饺。唔好以为夏天天气热大家都拣煎饺,因为呢度最出名嘅唔系饺子,而系汤底!招牌野葛菜煲生鱼猪骨汤无味精唔油腻,饮到鲜味但完全唔腥。饺子大大粒,皮滑多馅,加埋秘制辣菜脯一齐食十粒再饮埋碗汤,又系饱足嘅一餐。

足料潮州打冷  陵发潮州白粥


蚝仔肉碎粥童叟无欺,蚝仔肥美饱满,加埋肉碎同粥底嘅大地鱼,鲜甜无比。想食香口啲嘅可以嗌埋煎蚝饼。另一麻甩推介系韭菜猪红,望落以为好简单,但猪红夹落唔散入口滑溜,吸收哂酱汁精华,再点少少潮式辣椒油简直系绝配,韭菜一样入味唔洗再点任何调味。最后一提餐牌无写价钱,但唔少食客都觉得价钱公道,值得翻兜。

酸爽凉面vs热辣云吞  津津 好金の味


夏日炎炎,不如嚟碗凉面?呢度嘅凉面系重庆凉面,酱汁酸酸辣辣咁,配滑溜凉面同花生碎、葱花、芫茜等配料,香浓开胃。不过招牌菜其实系重庆云吞,亦即系红油抄手,唔好畀面头层红油吓到,一嚟一样可以自己拣辣度,二嚟味道偏香辣,唔会太呛喉亦唔会太麻。Bite Size云吞皮薄馅咸鲜,就算配清汤都一样有唔少捧场客。

隐世特色面包店  上野酵素面包生活馆

 呢间系唔少淀粉质控私藏嘅小店之一,招牌玫瑰洛神包嘅粉红色嚟自玫瑰粉,里面仲有蜜饯洛神花同Cream Cheese,质地比较实之余又唔干,细食嘅女士食半个就够饱。另外有相当考功夫嘅紫玉酥,一层层酥脆外皮下面系带自然香甜嘅芋泥。仲有香港平时好难搵到新鲜出炉嘅凤梨酥。虽然面包糕点单价唔低,但比连锁店嘅空气面包,CP值立刻高一班。

 

#太子#菠萝油#饺子#卤肉饭#打冷#港式#茶餐厅#冰室#点心#中式包点#台湾菜#中菜馆#粉面#米线#云吞#饺子#潮州菜#粥品#川菜 (四川)#拉面#汤品#小食店#面包店#素食

iWSD香港攻略